Waise Jessica ki tabiyat to woha aate hi bigad gayi thi, isiliye wo undono se alag apne kamre me aaram kar rahi thi.
Tabhi Teresa usse milne aati he, par uske kaafi awaaz lagane ke baad bhi Jessica koi jawab nahi deti.
Terese ko lagta he ki filhaal Jessica ko tang karna sahi nahi hoga, isiliye wo wohi uske bagal me baith kar, ek kitaab padhne lag jaati he.
Tabhi acchanak Jessica uth kar baith jaati he or ek behad ajeebo gareeb awaaz me, ussi line ko padhne lagti he, jisse Teresa man hi man padh rahi thi.
Ab isse pehle ki Teresa kuch samajh paati, Jessica ludak kar bistar se neech gir padti he.
Idhar Teresa ko kuch samjh nahi aa raha hota he, ki aakhir Jessica ko hua kia he, wo jaise hi Jessica ki madad karne uske paas jaati he, waise hi Jesica Teresa ki choti pakar kar, uske saare baal noch daalti he.
Dard se bilbilati Teresa bhaagte huye Caleb ke paas pahunchti he, par isse pehle ki wo Caleb ko kuch bata paati, peeche se Jessica bhi woha aa dhamakti he or aate hi us jheel me dubki maar deti he.
Caleb ko pata tha ki Jessica ko tairna nahi aata, isiliye wo bhi Jessica ko bachane ke liye jheel me kud padta he, thodi der baad Jessica us jheel se hawa me tairte huye baahar nikalti he or Teresa ke saamne Caleb ka kata hua sar fekti he, jisse dekh kar Teresa ki ruh kaap uthti he.
Par aakhir Jessica ko hua kia tha, yeh jaane ke liye hume kahani me ek din peeche jaana hoga, jab Beth naam ki ek ladki, washroom me baithi, apne pregnancy kit ki madad se, apna pregnancy test kar rahi thi.
Test ke baad aaye result ko dekh kar wo kuch upset ho jaati he or seedhe apni behen Ellie se milne uske ghar jaati he.
Ellie peshe se ek tattoo artist thi, jo apne teen baccho, Danny, Bridget or Kassie ke saath, seher se baahar ek viraan apartment me rehti thi.
Ussi apartment ke neechle floor me rehne wala Jake, apne chote bhai Scott ko lekar Bridget se milne uske darwaze par aata he, dar asal Jake Bridget ko like karta tha or movie dekhne ke bahane usse apne ghar par invite karne aaya tha.
Par Bridget ko Jake me zara bhi dilchaspi nahi thi, isiliye wo Jake se saath uske ghar jaane se mana kar deti he.
Ellie baccho ko kuch paise dete huye unhe Pizza laane bhej deti he taaki wo apni behen Beth se, akele me kuch baat kar sake.
Beth kaafi saalo baad Ellie se mil rahi thi, isiliye Ellie Beth se zara naaraz thi, Beth Ellie se usse kuch dino ke liye uske saath rehne dene ke liye request karti he, par Beth mana kar deti he.
Dar asal agle hi mahine se us viraan apartment ke rennovation ka kaam shuru hone wala tha, isiliye Ellie bhi jaldi hi us apartment ko khaali karke apne baccho ke saath kahi or shift hone waali thi.
Idhar bacche jab Pizza lekar apne ghar lout rahe they, tabhi acchanak ek tez bhukamp ka jhatka aata he jisse us apartment ke parking space me ek darar aa jaati he.
Us darar ko follow karte huye jab Danny thoda aage jaata he, tab usse woha ek gaddha nazar aata he, Bridget ke laakh mana karne ke bawajud bhi, Danny us gaddhe me neeche utar jaata he, jaha ek kamra bana hua tha.
Us kamre ki jaach padtal ke douran, Danny ko Naturam Demonto naam ki ek rahasyamayi kitaab milti he, saath hi saath woha kuch purane Vinyl discs bhi pade huye they.
Danny woha moujud un sabhi cheezo ko apne bag me bharkar, apne saath apne apartment me le aata he or Bridget ko dikhata he.
Bridget ko us rahasyamayi kitaab me zara bhi dilchaspi nahi thi, isiliye wo woha se chali jaati he, uske jaane ke baad Danny us kitaab ko kholne ki koshish karta he or ussi douran kitaab ke nukile daato se uski ungli kat jaati he.
Tabhi Danny ki ungliyo se khoon ki kuch bunde us kitaab par girti he jisse wo rahasyamayi kitaab, palak jhapakte hi apne andar sokh leti he or khoon sokhte hi wo kitaab bhi khul jaati he.
Us kitaab ke andar, paatal lok se judi, kaafi saari rahasyamayi jaankariya moujud thi, tabhi Danny ka dhyaan us rahasyamayi kitaab ke saath mile un 3 vinyl disk ki or jaata he.
Haalaki Bridget ne Danny ko us vinyl disc or saath hi saath us rahasyamayi kitaab se dur hi rehne ki sakht hidyat di thi, par Danny kaha kisi ki sunne wala tha.
Wo fatafat se us vinyl disk ko play karke sunne lagta he jisme church ke ek padri, us kitaab me likhe rahasyamayi mantro ko aasan sabdo me translate kar rahe they.
Padri ke darawne awaaz me, Mantra ke uccharan se acchanak us rahasyamayi kitaab me harkat hone lagti he, jisse dekh kar Danny ke passene choot jaate he, wo us vinyl disk player ko band karne ki kaafi koshish karta he par wo band nahi hota or mantro ka uccharan jaari rehta he.
Tabhi ek adrishya shakti azaad ho kar, goli ki raftaar se Ellie ke apartment ki taraf badhne lagti he, Ellie us waqt laundry se kapde lekar wapas apne floor par jaane ke lift se baahar nikli hi thi ki tabhi wo adrishya shakti us par hamla kar deti he.
Idhar bhukamp ki wajah se pure apartment me andhera chaaya hua tha, Bridget mombatti jala kar andhere se chutkara paane ki koshish karne me lagi huyi thi, tabhi Ellie langrate huye woha aati he or aate hi kitchen me jaa kar anda fry banane lagti he.
Gour karne waali baat to yeh thi ki Ellie kuch ande tawe me seedhe cheelke ke saath daal rahi thi, to kuch ande neeche zameen par, kuch ando me se to khoon bhi nikal raha tha.
Paas hi me khadi Beth or baaki bachhe, Ellie ki ajeebo gareeb harkat se kaafi dare huye they, tabhi acchnak Ellie ulti karte huye behosh ho jaati he.
Beth madad ke liye Ellie ke padosi Mr. Fonda or Gabriel ko bulati he, fir teeno Ellie ko sambhalte huye, usse uske bistar par le jaate he.
Ellie ab mar chuki thi, haalaki Gabriel, jab Ellie ki aankhe band karne ki koshish karta he, tab acchnak se Ellie ki aankhe, apne aap hi khul jaati he, jispar kisi ka dhyaan nahi jaata.
Kuch der baad ek makhhi aakar, Ellie ki khuli aankho par baith jaati he or tabhi acchanak. ELLIE, uth kar apne bistar par baith jaati he. Beth ko samajh nahi aata ki aakhir ye sab ho kia raha he, tabhi wo dekhti he ki Ellie ka sarir bukhar se jalne ko ho raha tha.
Wo turant baccho ki madad se Ellie ko uthakar, bathtub me bhare thande paani me daalti he, paani ke sparsh se Ellie ke sharir me tez halchal hone lagti he or wo lapak kar kisi girgit ki tarah, ceiling se jaa chipakti he.
Us adrishya shakti ne Ellie ko puri tarah se apne kabze me kar rakha tha, Ellie pagalo ki tarah cheekhne lagti he.
Uski cheekh sunkar Beth ke kaan ke parde fatne hi waale they, saath hi saath us tub me moujud barfila paani, puri tarah se khoulne laga tha.
Ellie ussi khoulte huye paani me kud padti he, bacche apni maa ka yeh bhayanak rup dekh kar puri tarah se dare huye they.
Kuch der baad Ellie, haath me kaanch ka ek tukda liye tub se baahar aati he or aate hi Beth par hamla kar deti he.
Iske baad wo Bridget ki taraf badhti he or Tattoo pen me apna khoon bhar kar, ussi se Bridget ke chehre par tattoo banane lag jaati he.
Tabhi Danny, kursi se Ellie ko maar kar, usse Bridget se dur karta he,
Ellie ki cheekh sunkar Gabriel bhi woha aa chuka tha, tabhi Ellie Gabriel par lapak kar chahar jaati he or uski ek aankh, apne daato se kaat kar baahar nikal deti he.
Dard se tilmilata hua Gabriel apartment se baahar nikalne ki koshish karta he par Ellie ab bhi uske peeche padi huyi thi, mouke ki nazakat ko samajhte huye Beth turant andar se darwaza band kar leti he.
Ellie ab baahar thi or wo Gabriel ke saath saath, Jake or uske chote bhai Scott ko bhi maar daalti he, Mr. Fonda apne shotgun se Ellie ko shoot karne ki koshish karte he par woh bhi Ellie ke keher se nahi bach paate.
Idhar Danny ne yeh anuman laga lia tha ki yeh sab jo uski maa ke saath ho raha he, kahi na kahi iski taar us rahasyamayi kitaab se judi huyi he.
Danny us rahasyamayi kitaab ke baare me Beth ko batata he, udhar Ellie ke andar moujud wo adrishya shakti, Kassie ko apni baato me uljha kar, darwaza kholne ke liye usse prerit karne lagti he.
Kassie Ellie ki baato me aakar darwaza khol hi chuki thi ki tabhi Beth or Danny woha aakar, Ellie ko andar aane se rok lete he.
Beth notice karti he ki Bridget aas paas kahi dikhai nahi de rahi, tabhi usse kitchen se kuch girne ki awaaz sunai deti he.
Beth jab kitchen me jaa kar woha ka nazara dekhti he tab uske pairo tale zameen asmaan sab khisak jaata he.
Woh dekhti he ki Bridget wohi kitchen ke counter par baithi, bade hi mazze se seeshe ka glass chaba rahi thi.
Darasal Ellie ke andar chupe us adrishya shakti ne jo tattoo pen me apna khoon bharkar, Bridget ke chehre par ek lakeer khichi thi, ussi wajah se Bridget ke upar bhi ab us adrishya shakti ne kabza kar lia tha.
Tabhi woha Danny bhi aa jaata he, Bridget Danny ke upar lapakti he par Danny kisi tarah apni jaan bacha kar ulte paao woha se apne kamre ki taraf bhaagta he.
Bridget bhi Danny ka peecha karte huye uske kamre me aa jaati he jaha Kassie bhi moujud thi, Kassie ko dekh kar Bridget uski taarf lapakti he, lekin anjaane me Kassie ne jo haath me doll pakra hua tha, uski chadi, seedhe Bridget ke muh me ghuste huye uske sir ke aar paar ho jaati he, jisse Bridget ki wohi mouke par hi mout ho jaati he.,
Danny ko ab bhi shak tha ki saayad Bridget firse Ellie ki tarah markar zinda ho sakti he, isiliye wo Bridget ki laash ko bistar se baandh deta he.
Udhar Beth kisi tarah battery ko jod-jaad kar, us vinyl disk player ko on karti he, taaki wo us vinyl disk ke teesre part ko sun kar, us adrishya shakti ko harane ka koi raasta dhund sake.
Vinyl disk ko sunne par Beth ko us adrishya sakti ke baare me pata chalta he jiska asli naaam Naturom Demonto he.
Demonto ko tab tak haraya nahi jaa sakta, jab tak us shakhs ke tukde tukde na kar diya jaaye, jispar Demonto ne apna kabza jama rakha he.
Udhar Ellie ghar ke andar ghusne ka raasta dhund rahi thi, tabhi wo vent se hote huye Danny ke kamre me ghus aati he jaha Beth baithi us Vinyl disk ko sun rahi thi.
Beth kisi tarah khudko Ellie yaani ki Demonto se bachane ki koshish karti he, udhar Bridget bhi wapas se zinda ho gayi thi or zinda hote hi sabse pehle wo Danny par chaaku se dhuadhaar hamla kar deti he, jisse Danny ki jaan chali jaati he.
Idhar Beth mouka milte hi Kassie ko apne saath lekar flat se baahar nikal jaati he, lekin us apartment ki seedhi tut chuki thi or lift ne bhi apna jawab de diya tha.
Beth fire exit se baahar nikalne ka faisla karti he lekin tabhi Ellie woha aa dhamakti he, saath hi saath Ellie ne jitne bhi logo ko apne haatho se maaara tha, ab un sabke andar Demonto ne kabza kar lia tha or wo sab ek saath milkar, Beth or Kassie ki taraf badhne lagte he.
Beth Kassie ko lekar kisi tarah parking space tak pahunch hi jaati he, fir dono Ellie ki car me baith kar woha se bhaagne lagte he lekin tabhi gaadi bhukamp ke jhatke se ubhare us darar me atak jaati he.
Tab tak Ellie bhi ek bahaynak rup liye woha aa chuki thi, Beth or Kassie turant gaadi se utarkar ek kone me chip jaate he.
Lekin Ellie Kasie ko dhund hi leti he or usse pakar kar parking space me khade ek garbage disposar truck me le jaati he.
Woha Ellie ki badan se chipka Danny, ek chainsaw ki madad se Kassie ke tukde tukde karne hi waala tha, ki tabhi Beth woha aa jaati he or kisi tarah Kassie ko mout ke muh me jaane se bacha hi leti he.
Ellie ab Beth ko maarne ke liye uski taraf badhne lagti he, lekin tabhi Beth ke ishaade par Kassie us garbage disposar truck ko on kar deti he jisse Ellie ki taang us disposar me fas kar machine ke andar jaane lagti he.
Beth bhi ussi chainsaw ki madad se Ellie ke sir ke tukde tukde kar daalti he or aakhir me, kisi tarah unhe Ellie ke andar chupe us Demonto se chutkara mil hi jaata he.
Kassie apni maa or bhai-behen ko kho kar, kaafi zyada dukhi thi, Beth usse housla dilati he ki wo uska ek maa ki tarah hi khyaal rakhegi or kabhi usse uski maa ki kami mehsuh nahi hone degi, itna keh kar dono us viraan apartment se baahar nikal jaate he.
Agli subha Jessica, jise humne film ki shuruat me dekha tha, apne boyfriend Caleb or apni best-friend Teresa ke saath jheel ke kinaare base ek lake house me apni chuttiya bitane ke liye jaa rahi hoti he.
Jessica ussi apartment ke neechle floor me rehti thi, ab kiu ki saara kaand top floor me hua tha isiliye Jessica ko peechhli raat ke baare me zara bhi idea nahi tha.
Lekin jab wo parking space me pahunchti he tab har taraf khoon or maans ke lothre dekh kar uska sir ghum jaata he, tabhi ek adrishya shakti us par hamla kar deti he or yahi is film ka the end ho jaata he, to ummedd karte he ki ab aapko film ki shuruat me jo hua tha, uski kahani puri tarah se samajh me aa chuki hogi.
